La cucàgna dal "re zavâta"

LA CUCÀGNA DAL "RE ZAVÂTA"

La cucàgna dal Re Zavâta

tòtt la zercan, inciòn la câta.

L'é un paes d'la fantasî,

in realté an esest brî.

Se al fòs vera, làsem dîr,

là ai srêv un lavurîr:

tòtt quant a bôca péina

da la sîra a la matéina!

I an 'tachè con du turtlén

con un bel bichîr ad vén;

di turtlòn, dal tajadèl,

al zinghièl col papardèl.

Du gnuchét al gorgonzôla,

'na delezia par la gôla!

La gramàgna, al lasàgn:

quant in vad, tanti in màgn.

E dvurèr senza sosta

dal pass gât e dl'aragosta,

d'la panzâta e dal parsòtt;

ai n'è, che in pôlan magnèr tòtt!

D'la puléinta ai n'é un parôl

da gustèr fen che on l'in vôl,

da magnèr senza stézza

con zinquant piz ed śuśézza.

Tant bon piât i an preparè,

un po' ed tòti al qualitè:

i'era di dolz, di salè,

cheld, fràdd e giazè.

Intant as vàdden i camarîr

a pasèr con di bichîr

ed vén bianc, råss e rosé;

ai n'ira un sac ed varietè!

Al Rosolì al va par i fos

con al Lambrosc dôlz e gros.

Al Pinot, l'Albèna, al Tocai:

quand t'al bàv ta't scord i guai...

Ma se a fòs vera un paes acsé,

in baldoria tòtt al dé,

av dég, la vétta la saré piò bèla.

Toc e dai, la zirudèla.

Franco Boldrini 

LA CUCCAGNA DEL "RE CIABATTA"

La cuccagna del Re Ciabatta

tutti la cercano, nessuno la trova.

È un paese di fantasia,

in realtà non esiste.

Se fosse vero, lasciatemi dire,

là ci sarebbe una gran baraonda:

tutti quanti a bocca piena

dalla sera alla mattina!

Hanno iniziato con due tortellini

e un bel bicchiere di vino;

tortelloni, tagliatelle

e cinghiale con le pappardelle.

Due gnocchetti al gorgonzola,

una delizia per la gola!

La gramigna, le lasagne:

quante ne vedi, tante ne mangi.

E divorare senza sosta

pesce gatto ed aragosta,

pancetta e prosciutto;

ce n'è, che possono mangiare tutti!

Di polenta ce n'è un paiolo

da gustare finché uno vuole,

da mangiare senza stizza

con cinquanta pezzi di salsiccia.

Tanti buoni piatti hanno preparato,

un po' di tutte le qualità:

c’era roba dolce, salata,

calda, fredda e gelata.

Intanto si vedono i camerieri

passare con dei bicchieri

di vino bianco, rosso e rosato;

ce n’erano un sacco di varietà!

Il Rosolio va per i fossi

con il Lambrusco dolce e grosso.

Il Pinot, l’Albana, il Tocai:

quando li bevi ti scordi i guai…

Ma se fosse reale un paese così,

in baldoria tutto il giorno,

vi dico, la vita sarebbe più bella.

Toc e dai, la zirudella.