I DU CONDOMÉNNI

Ai'é un palàz in una vî
c'al fa fadiga a stèr in pî.
L'è talmént dirochè
c'al sta drétt par caritè...

L'è un palàz dal tänp d'la Guèra,
ed quand a ira ancåura l'èra.
A ira al poz, al lavadur,
un pôc piò in là al piśadur.

A ira un ôrt drî a la mura
duv as cuiéva un po' ed verdura,
un vanizén con di pundôr
e dal zócchi con i su fiôr.

Un condoménni, se non ètar,
dóvv i s'aiutan on con cl'ètar.
I en cuntént, saviv parché?
"Cuntént té, al son anca mé."

Invêzi piò in là, long a la strè,
ai n'é on tót rezintè:
un gratazîl tót mudéran,
quasst as vàdd anc da l'estéran.

Alåura mé, curiåus cum a son,
a son andè drî a un balôn;
a vliva vàddar, se non ètar,
se dèntar l'ira come cl'ètar.

A un zert pont a son avanzè
quand a s'è avért la canzlè:
in dal curtîl ai ò nutè
tótta un'ètra realtè...

A n'ira brîśa al piśadôr
e al vanizén con i pundôr,
ma di machinån esagerè
tótt in fila parchegè!

Dòpp un zert mumént,
ai ò vésst un mócc' ed zent.
I s'en incuntrè in d'la piâza
e i'n s'en gnanc guardè in fâza.

Quest vôl dîr, a parér mî,
che i bajûc i'n bàstan brî:
pôvar o reć, a'n cônta gnint,
gnanc stèr in un bèl sît.

Mé a spér d’èser stè cèr,
e adès um ven ed pensèr
ch'a sia ‘na veritè brî tant bèla…
Toc e dai, la zirudèla.

Franco Boldrini 

I DUE CONDOMÍNI

C'è un palazzo in una via
che fa fatica a stare in piedi.
È talmente diroccato
che sta dritto per miracolo...

È un palazzo della Guerra,
di quando c'era ancora l'aia.
C'era il pozzo, il lavatoio,
poco più in là l'orinatoio.

C'era un orto dietro al muro di cinta
dove si raccoglieva un po' di verdura,
un'aiuola con dei pomodori
e delle zucche con i loro fiori.

Un condominio, se non altro,
dove si aiutano uno con l'altro.
Sono contenti, sapete perché?
"Contento tu, lo sono anche io."

Invece più in là, lungo la strada,
ce n'è uno tutto recintato:
un grattacielo tutto moderno,
questo si vede anche dall'esterno.

Allora io, curioso come sono,
ho seguito un pallone;
volevo vedere, se non altro,
se dentro era come quell'altro.

Ad un certo punto ho proseguito
quando si è aperta la cancellata:
nel cortile ho notato
tutta un'altra realtà...

Non c'era l'orinatoio
e l'aiuola con i pomodori,
ma dei macchinoni esagerati
tutti in fila parcheggiati!

Dopo un momento,
ho visto un mucchio di gente.
Si sono incontrati nella piazza
e non si sono neanche guardati in faccia.

Questo vuol dire, a mio parere,
che i soldi non bastano mai:
povero o ricco, non conta niente,
nemmeno stare in un bel posto.

Io spero di essere stato chiaro,
e adesso mi viene da pensare
che sia una verità non tanto bella...
Toc e dai, la zirudella.